(سبه‌ی‌):
سه‌رله‌به‌یانی‌ ئه‌مڕۆ ده‌یان كه‌س له‌ دانیشتوانی‌ شاری‌ خانه‌قین وه‌ك نا‌ڕه‌زاییه‌ك به‌رامبه‌ر به‌هاتنی‌ سوپای‌ عێراق بۆناو شارۆچكه‌كه‌ خۆپیشاندانێكی‌ جه‌ماوه‌رییان به‌كۆمه‌ڵێك دروشمی‌ نه‌ته‌وایه‌تی‌ و ئاڵای‌ كوردستانه‌وه‌ سازكرد.
خۆپیشانده‌ران له‌لایه‌ن كۆمه‌ڵێك له‌ سه‌ركردایه‌تی‌ حیزبه‌ كوردییه‌كان و به‌رپرسانی‌ ناوچه‌كه‌وه‌ پێشوازییان لێكرا و له‌لایه‌ن مه‌لا به‌ختیاره‌وه‌ وتارێك بۆ خۆپیشانده‌ران درا.

بڕیار نامیق(سبه‌ی‌):
پاش ئه‌وه‌ی‌ دوێنێ‌ ژماره‌یه‌ك له‌ سه‌ركردایه‌تی‌ یه‌كێتی‌ و پارتی‌ گه‌یشتنه‌ شارۆچكه‌ی‌ خانه‌قینیان، سه‌رله‌به‌یانی‌ ئه‌مڕۆش وه‌فدێكی‌ حكومه‌تی‌ هه‌رێمی‌ كوردستان كه‌ پێكهاتووه‌ له‌ عیماد ئه‌حمه‌د و زه‌عیم عه‌لی‌ و چه‌ند یه‌كه‌یه‌كی‌ فه‌رمانده‌یی‌ هێزی‌ پێشمه‌رگه‌ گه‌یشتنه‌ ناوچه‌كه‌.

بڕیار نامیق (سبه‌ی):
هاتنه‌ناوه‌وه‌ی هێزه‌كانی سوپای عیراق بۆ خانه‌قین نائارامی و په‌شێوی له‌و قه‌زایه‌دا خولقاندووه‌ و له‌به‌رامبه‌ر ئه‌و هه‌نگاوه‌ی سوپای عیراقدا، هاووڵاتیان و دام و ده‌زگا حكومی و حزبییه‌كان و رێكخراوه‌ مه‌ده‌نییه‌كان خۆپیشاندان ساز ده‌كه‌ن، به‌پێی وته‌ی سه‌رچاوه‌یه‌كی به‌رپرسیش له‌سه‌ر هه‌موو دامو ده‌زگاكان و زۆربه‌ی ماڵه‌كانیش  ئاڵای كوردستان هه‌ڵده‌كرێت.

(سبه‌ی):
 قایمقامی‌ قه‌زای‌ خانه‌قین راگه‌یاند هێزێكی‌ زۆری سوپای عێراق، له‌ سه‌رله‌به‌یانیی‌ ئه‌مڕۆ دووشه‌ممه‌وه‌، چۆته‌ خانه‌قین و مه‌رزی‌ مه‌نزه‌ریه‌ و خاڵی‌ پشكنینی داناوه‌، رونیشیكرده‌وه‌ كه‌ ئه‌و ته‌ده‌خوله‌ به‌ توندی‌ له‌ لایه‌ن خه‌ڵك و حزبه‌ كوردستانیه‌كان و ئیداره‌ی‌ شاره‌كه‌وه‌ ره‌تده‌كرێته‌وه‌ و بۆ ئه‌و مه‌به‌سته‌ش سبه‌ی‌ له‌ خانه‌قین خۆپیشاندانێك به‌ڕێوه‌ده‌چێت.